Güei nun se fala d'otra cosa. Y agora entamamos, o meyor, siguimos colo de si monarquía o república y a oyer una y otra vegada que foi'l Rei'l que truxo la "democracia" a esti país. D'eso nada. Lo que llamamos "democracia" vino porque la clas capitalista taba tres d'ello, pues otramiente, nun habría entrada na CEE, lo que pal so desendolcu yera dalgo esencial. Nesti sen, Franco morrió en mui bon momentu y ensin que la clas más favorecida pol so réxime tuviera la necesidá d'echalu, ya que nun hai dulda dala de que si tuvieren tala necesidá, d'una manera o d'otra acabaríen faciéndolo. Poro, el Rei nin foi un héroe nin mos truxo nada; nun fizo más que lo qu'interesaba a y necesitaba la burguesía; burguesía que cuando-y vino bien caltener a Franco nel poder pa que-y controlara a la clas trabayadora, bien lo fizo: unos cuarenta años. Y xunto cola burguesía, tamién alcontramos a los teóricos partíos de clas: el PCE y'l PSOE. Estos dexaron de llau tolos sos principios y aceutaron, ensin rechistar, esa "democracia" que la burguesía quería. Y entós ¿qué facíen? Pues qué diben facer: el caldu gordu a los grandes burgueses. Estos, como son xente mui fino y educao nun avecen a salir glayando peles cais nin muncho menos a andar a palos coles fuercies d'orde públicu, asina que, d'acordies colos "comunistes" y "socialistes", pa convencer al Gobiernu d'Arias Navarro y a los militares de que yera necesaria la "democracia", aparentaron dexar la iniciativa a les clases populares. La cuestión nun yera qu'Arias Navarro nun quixera la "democracia", lo que daba igual, ye que taba perdiendo'l tiempu con aquello de les asociaciones y l' "espíritu del 12 de febreru",. que nun yera'l marcu qu'esixía la burguesía. Tocante a los militares, estos nun metieron muncho ruíu (quitando d'algún ilumináu), pues decatábense qu'ensin el cambeu "democráticu", d'entrar na OTAN, nada de nada; y eso yera un carambelu que, prestando-yos abondo, nun yera cuestión de quedase ensin él. Asina que la engañifa tuvo perbien montada: burguesía y militares, d'aclcuerdu, unos partíos que se suponía que yeren de clas, dispuestos a traicionar los sos principios n'ares d'un posibilismu inxustificáu, total: la "transición democrática" y toos tan contentos. La "democracia" ye la "democracia" y'l Rei'l so profeta.
Esti día dicía "El País" que Florentino Pérez, el d'ACS, tien pensao aportar a los mil millones d'euros de ganancies d'equí a dos años (a costa d'esplotar tolo y a tol que se-y ponga per delantre). Y, demientres, tou dios pensando en si monarquía o república. Llueu quexámonos de lo que pasa.
Esti día dicía "El País" que Florentino Pérez, el d'ACS, tien pensao aportar a los mil millones d'euros de ganancies d'equí a dos años (a costa d'esplotar tolo y a tol que se-y ponga per delantre). Y, demientres, tou dios pensando en si monarquía o república. Llueu quexámonos de lo que pasa.
Comentarios
Publicar un comentario